Gimi është një këngëtar shqiptar nga Kosova, i cili është rritur dhe jeton në
Danimarkë së bashku me familjen e tij. Ai tërhoqi vëmendjen tonë për herë të
parë në vitin 2016 me publikimin e këngës In Case We Die. Pothuajse
dhjetë vjet më vonë, ai ka krijuar një emër në skenën lokale, ka bërë që të
shkruhet për të në publikime të njohura si revista Paper, ka publikuar
një EP me titull Polari dhe këtë javë sjell albumin e ri The Greatest
Hits.
Nëse ju pëlqejnë ritmet elektro-pop, tekstet ngacmuese me pak
sarkazëm dhe dëshironi të kërceni, ky album është për ju. Duke filluar nga data
7 nëntor, mund ta gjeni në të gjitha platformat muzikore.
Përshëndetje
Gimi, si ke qenë! Ka kaluar kaq shumë kohë nga hera e fundit që kemi folur. Më
duket në 2016-ën mos gaboj? Më bëhet qejfi që je rikthyer dhe në formë më të
mirë se kurrë!
Heeeej, jam shumë mirë, faleminderit! Po, ka kaluar vërtet shuuuuumë kohë, dhe
është e çmenduri të mendosh që Albanyac më ka mbështetur që prej fillimit. E
vlerësoj jashtëzakonisht shumë. Nuk po më besohet që ka qenë në 2016-ën, kur dhe
publikova këngëzën time të parë në SoundCloud hahaha!
Ke
publikuar disa single këtë vit dhe tani ke një album të ri që del më 7 nëntor,
kështu që duket se po “i futesh” muzikës me gjithë forcë këtë vit dhe në 2026!
Yeah, kam publikuar single gjatë gjithë vitit dhe më në fund ka ardhur koha për
albumin tim të parë ‘Greatest Hits’! Jam shumë i emocionuar dhe mezi pres që ta
dëgjoni!
A do të
jetë ky album ndryshe nga “Polari” apo punët e tua të mëparshme, apo do të
mbetesh besnik ndaj tingullit dhe teksteve të tua?
Krahasuar me EP-në time të parë, ‘Polari’, do të thosha që në ‘Greatest Hits’
jam më i sinqertë dhe më vetvetja se kurrë. Në aspektin muzikor, jam gjithmonë
duke evoluar, dhe doja të shtyja kufijtë e mi me këtë projekt. Ndërsa thelbi
prodhimtarisë sime mbetet pop-i, nuk doja të kufizohesha në një zhanër të
vetëm. Në album do të gjeni gjithçka – nga momente ritmike të forta, ritme
klubi me përzierje ballkanike në ‘DADDY’, te ndjesi hyperpop në ‘I LIKE U’, dhe
madje ndikime të dukshme nga RnB dhe UK garage i viteve ‘90 në ‘Communicate
it’.
Duke
folur për tekstet – duken shumë personale dhe të detajuara. Më pëlqen, për
shembull, vargu I’ve been waiting since you said ‘hey’ at Elina’s party/ now
I want you to stay/ në I Like U. Të bën të ndihesh si pjesë e teksit,
e asaj që po përshkruhet. Çfarë ndodhi në festën e Elinës? Kush është Elina?
Thuaji që dua të vij në festën e saj, hahaa!
Hahahaha po, më bëre
të qesh që e përmende atë varg! Pra, Elina është shoqja ime më e mirë, të cilën
e takova kur jetoja në Londër. Jetonim bashkë dhe organizonim festa në banesën
tonë në East London. Gjithmonë bëheshin rrëmujë, por ishin shumë argëtuese.
Kënga është si një dedikim për të dhe për atë periudhë që kaluam bashkë. Ajo
gjithashtu ka bashkëshkruar këngën ‘crazy ex-boyfriend’ nga albumi. Është
fantastike!
Kopertinat
e projekteve të tua janë bërë mjaft provokuese me kalimin e viteve. Ajo për Daddy?
Dhe ajo për I Like U! Nuk mundem haaaa! Si reagojnë njerëzit ndaj tyre?
Çfarë do të thuash me “provokuese”??? Hahaha jo jo, e kuptoj. Me vizualet doja
të eksploroja idenë e fantazisë dhe imagjinatës. Kur bëhet fjalë për
seksualitetin, mendoj se fantazia është pothuajse gjithmonë më emocionuese se
realiteti. Sepse në fantazi, ti je zot i vetes, ti vendos si rrjedh historia.
Me mënyrën si është prerë imazhi në kopertinë, edhe pse është sugjestiv, lë
hapësirë për shikuesin të krijojë historinë dhe fantazinë e vet përtej kufijve
të fotos. Përveç ndonjë tipi të ‘etur’ që më futet në DM, reagimet kanë qenë
shumë të mira.
E di që
je rritur në Danimarkë, por mund të na tregosh diçka më shumë për fëmijërinë
tënde dhe si u përfshive në muzikë?
Prindërit e mi kosovarë na detyruan të gjithëve (mua dhe dy motrave) të merrnim
mësime muzike hahaha. Ishin shumë këmbëngulës që të provonim hobi të ndryshme
për të parë çfarë na pëlqente. Kështu që fillova në një klasë ‘ritmi dhe
perkusionesh’ me plot fëmijë të tjerë kur isha rreth 6 vjeç. Pastaj fillova
mësimet e basit – mos më pyet pse zgjodha basin si instrumentin tim kryesor,
ndoshta më dukej instrumenti më “djalosh”, dhe duket qartë që kam dashur me
kompensu hahaha!
Por, yeah ishte diçka që më bëri më pas të filloja leksione kitare e pianoje...
Megjithatë gjithmonë doja të këndoja dhe të shkruaja këngë – e bëja fshehurazi
në shtëpi. Isha basisti në bandën e shkollës, dhe një ditë mamaja i kishte
thënë mësuesit të muzikës që unë këndoja gjithmonë në shtëpi dhe donte të dinte
nëse kisha vërtet potencial apo I dukej asaj ashtu vetëm se ishte nëna ime.
Pikërisht atë javë këngëtari kryesor i bandës kishte dhënë dorëheqjen, dhe
mësuesi më kërkoi ta provoja. E mbaj mend emocionin dhe ankthin e herës së parë
që këndova në mikrofon. Ia kam borxh mamit që më shtyu drejt muzikës dhe që më
ka mbështetur gjithmonë – nuk e di ku do të isha nëse ajo nuk do e kishte
shtyrë këtë djalosh të vogël e të turpshëm që të ndiqte ëndrrat e tij.
A e ndjek
skenën muzikore shqiptare? Çfarë mendon për të?
Po, padyshim! Mendoj që është shumë interesante. Jam rritur me muzikë shqiptare
dhe më pëlqen shumë si po përparon skena muzikore shqiptare dhe sesi po
eksperimentojnë artistët shqiptarë me zhanre të ndryshme dhe mënyrën e tyre të
të shprehurit.
Ndonjë
artist shqiptar që po dëgjon momentalisht?
Mendoj që Sahati është shumë interesante. Kemi performuar bashkë në Prishtinë
vitin e kaluar dhe është super e talentuar. Ka edhe një producente shqiptare
nga Kosova e cila jeton në Berlin, quhet Lisa Kida, dhe jam i dashuruar me
tingujt e saj – mendoj se shumë shpejt do të jetë në ‘buzët’ e të gjithëve. Dhe
sigurisht, OG-ja, mbretëresha ime: Adelina Ismaili! Do të mbetet gjithmonë
artistja ime e preferuar. Së fundmi bëra një version të këngës së saj ‘Shko
n’R.S’ në TikTok dhe ajo e komentoi dhe e rishpërndau! Kur të them që isha gati
të qaja!!!
Momentalisht
tregu evropian i muzikës më duket pak i çuditshëm. Nuk duket sikur ka më
pop-stars evropianë si dikur – kishim artistë nga Gjermania, Mbretëria e
Bashkuar, Franca, Suedia, Italia, Rumania, Rusia etj., ndërsa tani duket sikur
të gjithë të famshmit evropianë dalin përmes SHBA-ve. Pse mendon se po ndodh
kjo?
Mendoj se skena muzikore në mbarë botën është bërë shumë e “nacionalizuar”. Çdo
vend ka artistët e vet, por industria i shtyn vetëm në nivel kombëtar, nëse
mund ta them kështu. Për shembull, me Spotify – sepse unë banoj në Danimarkë,
muzika ime promovohet kryesisht këtu. Çdo treg muzikor promovon artistët
vendas. Dhe mendoj se kjo është arsyeja pse ndodh. Kemi kaq shumë pop-stars
evropianë por ndoshta, thjesht nuk dëgjojmë aq shumë për ta sa më parë.
A ke
planifikuar ndonjë koncert për albumin e ri?
Po, koncerti im i radhës do të jetë në Londër më 28 nëntor në HWK në Hackney.
Turn up!!!
Ke
menduar të mbash koncert në Kosovë ose Shqipëri?
Nuk kam performuar asnjëherë në Shqipëri! Por do të doja shumë! Do të doja të
bëja më shumë koncerte edhe në Kosovë – kam bërë disa në Prishtinë, por do të
doja të rikthehesha. Do të ishte shumë cool sikur të performoja në Sunny Hill!
Hit me up Sunny Hill <3
Duke të
uruar që ta kalosh sa më mirë në festën e publikimit të albumit më 7 nëntor,
para se ta mbyllim këtë intervistë duhet ta di: nëse nuk e vrave burrin tënd,
kush e vrau atë? 👅😂
Hahahahaha, nuk e di!! Thjesht vdiq në mënyrë misterioze! Nuk e helmova, të
betohem. Më mungon çdo ditë, por jam i lumtur që më la mjaftueshëm para në
testament për të ndjekur ëndrrën time – të bëhem ylli i ardhshëm
kosovaro-shqiptar i pop-it <3
Faleminderit!
Intervistoi: Elbino
Albanyac @ 11/2025
Post a Comment